आगामी २१ मंसिरमा हुन लागेको प्रतिनिधिसभा र प्रदेश सभा सदस्यका निर्वाचनका लागि इलाममा १७ वटा मतदान केन्द्र थपिएका छन् । जिल्लाको एक सय ४४ मतदान स्थलमा १७ वटा मतदान केन्द्र थप गरिएको जिल्ला निर्वाचन कार्यालय इलामले जनाएको छ ।
जिल्ला निर्वाचन कार्यालय इलामका अनुसार जिल्लामा मतदान केन्द्र दुई सय ६६ पुगेको छ । यसअघि जिल्लामा एक सय ४४ मतदान स्थल र दुई सय ४९ मतदान केन्द्र थिए । मतदान स्थल भने थपिएको छैन ।
४ वटा नगरपालिका र ६ वटा गाउँपालिका सहति १० स्थानीय तह रहेको जिल्लाका आठ स्थानीय तहमा १७ वटा मतदान केन्द्र थपिएको जिल्ला निर्वाचन कार्यालयका सूचना अधिकारी कृष्णबहादुर लिम्बूले नयाँ बुलन्दलाई जानकारी दिए ।
उनका अनुसार इलाम नगरपालिकामा चार वटा केन्द्र थपिएका छन् । २४ मतदान स्थाल र ४१ वटा मतदान केन्द्र रहेको इलाम नगरपालिकामा अब मतदान केन्द्रको संख्या ४५ पुगेको छ । २१ वटा मतदान स्थल र ४७ वटा मतदान केन्द्र रहेको सुर्योदय नगरपालिकामा एउटा मतदान केन्द्र थपिएको छ ।देउमाई नगरपालिकामा चार वटा मतदान केन्द्र थपिएका छन् ।
१८ मतदान स्थल र २७ मतदान केन्द्र रहेको देउमाईमा मतदान कन्द्र ३१ कायम गरिएको छ । ११ मतदान स्थाल र २४ मतदान केन्द्र रहेको माई नगरपालिकामा दुई मतदान केन्द्र थपिएका छन् । चुलाचुली गाउँपालिका र फाकफोकथुम गाउँपालिकामा दुई दुई मतदान केन्द्र थपिएका छन् । यसअघि चुलाचुलीमा ९ मतदान स्थल र १८ मतदान केन्द्र तथा फाकफोकथुममा १४ मतदान स्थल र १९ मतदान केन्द्र थियो ।
त्यसैगरी माङसेबुङ र रोङ गाउँपालिकामा एक एक वटा मात्र केन्द्र थप भएका छन् । त्यहाँ क्रमश ः १० मतदान स्थल र १६ मतदान केन्द्र तथा १३ मतदान स्थल र १९ मतदान केन्द्र थिए ।
सन्दकपुर र माईजोगमाईमा भने केन्द्र थप नभएको सुचना अधिकारी लिम्बूले जानकारी दिए । सन्दकपुरमा १३ मतदान स्थल र १८ केन्द्र तथा माईजोगमाईमा ११ मतदान स्थल र २० मतदान केन्द्र छन् ।
इलाममा मतदान स्थल र मतदान केन्द्र थप गर्न जिल्ला निर्वाचन कार्यालयले राजनीतिक दलसँग परामर्श गरी आयोगमा सिफारिस गरी पठाएको थियो । तर आयोगले मतदान स्थल पुरानै कायम रहने गरी मतदान केन्द्र बढाएको हो ।
इलाममा स्थानीय तहको मतदाता संख्या भन्दा १४ हजार सात सय ७२ नयाँ मतदाता थप भएका छन् ।
स्थानीय तहको निर्वाचन लगत्तै निर्वाचन आयोगले प्रत्येक निर्वाचन कार्यालय र स्थानीय तहमा फोटोसहितको मतदाता नामावली अध्यावधिक कार्यक्रम सञ्चालन गरेपछि मतदाता बृद्धि भएको हो ।
प्रतिनिधिसभा र प्रदेशसभा सदस्य निर्वाचनका लागि इलाममा दुई लाख चार हजार ४६ मतदाता छन् । जसमध्ये ९९ हजार तीन सय ५० महिला, एक लाख चार हजार छ सय ९४ पुरुष र दुई जना तेश्रो लिङ्गी रहेको जिल्ला निर्वाचन कार्यालय इलामले जनाएको छ ।
http://nayabulanda.com/
0 comments: