चुलाचुली गाउँपालिकाको पहलमा वन फँडानी नियन्त्रण गर्न कार्यदल

दक्षिणपश्चिमी इलामको चुलाचुली गाउँपालिकाले आफ्नो क्षेत्रको वन पैदावार अवैध फँडानी र चोरी निकासी रोक्न पहल थालेको छ । गाउँपालिकाकै पहलमा मङ्गलबार सर्बपक्षीय बैठकबाट फँडानी नियन्त्रणका लागि कार्यदलसमेत बनाइएको गाउँपालिकाका प्रशासकीय अधिकृत छविलाल खतिवडाले जानकारी दिए ।
गाउँपालिका अध्यक्ष प्रदिपचन्द्र राईको अध्यक्षतामा सुरक्षा निकाय, वन कार्यालयका कर्मचारी तथा सशस्त्र वन रक्षक, स्थानीय सामुदायिक वन उपभोक्ता समितिका प्रतिनिधीहरुसमेतको संलग्नतामा सपत्र बैठकले वन फँडानी नियन्त्रण कार्यदल तयार गरेको हो । गाउँपालिका गाउँ कार्यपालिकाको नियन्त्रणमा रहने उक्त कार्यदलले गाउँमा चेतनामूलक कार्यक्रमहरू सञ्चालन गर्ने, सामुदायिक वन उपभोक्ता समितिहरुसँग छलफल तथा अन्तरक्रिया गर्ने र रात्री गस्तीसम्मको माध्यमबाट अवैध फँडानी नियन्त्रण गर्ने जस्ता काम गर्ने जनाइएको छ । 
चुलाचुली गाउँपालिका क्षेत्रमा जम्मा १३ वटा सामुदायिक वन उपभोक्ता समितिहरु रहेका छन् । ती सामुदायिक वनका जङ्गलमा भएका ९० प्रतिशत रुखहरू साल (सखुवा) जातका छन् । काठमध्येको सबैभन्दा महङ्गो र बढी समय खप्ने अर्थात् सबैभन्दा गुणस्तरीय सखुवाको रुख चोरी निकासी धेरै हुने गरेको छ । 
झापाको दमक नजिकै पर्ने फाँटिलो भेग रहेको चुलाचुली गाउँपालिकामा रहेको सखुवा चोरी निकासी गरेर झापाका विभिन्न भाग तथा भारतीय क्षेत्रसम्म पु¥याउने गरेको पाइएको छ । हिउँदमा साइकल, रिक्सा, गाडा, ट्याक्टरलगायतका गाडिमा र बर्षाद्मा स्थानीय रतुवा, मावा लगायतका खोलामा बगाएर चोरी निकासी हुने गरेको छ ।

चुलाचुली समाचार

सेयर गर्नुस्