झलनाथ खनालले नयाँ प्रतिस्पर्धी पाउँदा सुवास नेम्वाङलाई पुरानै

एमाले वरिष्ठ नेता झलनाथ खनालले प्रतिनिधिसभाको चुनावमा नयाँ प्रतिष्पर्धी पाएका छन् । वाम गठवन्धनको तर्फबाट इलाम क्षेत्र नम्बर १ मा उम्मेद्वार बनेका खनाललाई चुनौती दिन कांग्रेसले पूर्व क्षेत्रीय सभापति भुपेन्द्र कट्टेललाई उम्मेदवार बनाएको छ । 

पाँचौ पटक केन्द्रीय संसदमा प्रतिनिधि बन्न प्रत्यक्ष चुनावी मैदानमा रहेका एमाले नेता खनाललाई नयाँ अनुहार कट्टेलले चुनौती दिने भएका हुन् । पूर्वसभामुख समेत रहेका एमाले संसदीय दलका उपनेता सुवासचन्द्र नेम्वाङसँग भने पुरानै अनुहार भिड्ने भएका छन् । 

पहिलो संविधानसभाको निर्वाचनमा नेम्वाङसँग चुनाव लडेका कांग्रेस नेता केशव थापालाई कांग्रेसले इलामको क्षेत्रनम्बर दुईबाट उम्मेदवार बनाएको छ । थापा पहिलो संविधानसभाको चुनावमा नेम्वाङसँग पराजित भएका थिए । उनी संविधानसभाको अर्को निर्वाचनमा भने निर्वाचन क्षेत्र परिवर्तन गरेर निर्वाचित भएका थिए । झापामा लोकतान्त्रीक गठवन्धनमा रहेका कांग्रेस र राप्रकाबीचको तालमेल भाडिएपछि मेचीको चारै जिल्लामा राप्रपाले वामगठवन्धनका उम्मेदवारलाई सहयोग गर्ने बताइएको छ । 

यस्तै वाम गठबन्धनले क्षेत्र नम्बर १ को प्रदेशसभा १ मा  एमालेकी खिनु लङवा लिम्बूलाई उम्मेद्वार बनाएको छ । उनी प्रत्यक्षतर्फ टिकट पाउने इलामकी एक्ली महिला उम्मेदवार हुन् । क्षेत्र नम्बर १ को २ एमालेका काजीमान कागतेको उम्मेदवारी टुंग्याएको हो । प्रदेशसभाको  अन्तर्गत २ को १ मा एमालेका जिल्ला अध्यक्ष रामबहादुर राना र क्षेत्र नम्बर २ को २ बाट माओवादी केन्द्रका जिल्ला इन्चार्ज धिरेन शर्मालाई उम्मेदवार बनाएको छ ।  वाम गठवन्धनको तर्फबाट उम्मेदवार बनेकाहरुको परिचयात्मक कार्यक्रम सदरमुकाममा सम्पन्न भएको छ । कार्यक्रममा प्रदेशसभाका प्रत्यक्ष तर्फको उम्मेदवारहरुले समाजवादको आधार खडा गर्नका लागि वामपन्थीहरुकाबीचमा तालमेल भएकाले गठवन्धप्रति फैलाइएको भ्रममा नपर्न आग्रह गरेका छन् ।

कांग्रेसले समाजवादलाई नै अधिनायकत्वको रुपमा व्याख्या गरिरहेको भन्दै त्यस्तो भ्रममा नपर्न एमाले जिल्ला अध्यक्ष राम रानाले आग्रह गरे । माओवादी केन्द्रका जिल्ला इन्चार्ज समेत रहेका धिरेन शर्माले सामाजिक न्याय सहितको समाजवादी व्यवस्था स्थापना गरेर संविधानको कार्यान्वयन गर्न गठवन्धन बनेको प्रष्ट्याए । 

यता कांग्रेसले पनि जिल्लाबाट निर्वाचन लड्ने प्रदेशसभाका उम्मेद्वार छनोट गरेको छ । कांग्रेसको केन्द्रीय समितिले १ को १ बाट देवेन्द्र राईलाई उम्मेदवार बनाउने निर्णय गरेको छ । संघीय समाजवादी फोरमका अध्यक्ष रहेका राईले दल बदलेर कांग्रेसबाट टिकट पाएका हुन् । 
यसअघि राई कांग्रेस परित्याग गरेर अशोक राई नेतृत्वको संघीय समाजवादी पार्टीमा गएका थिए । कांग्रेसले निर्वाचन क्षेत्र नम्बर–१ को २ बाट दुर्गा बराललाई उम्मेदवार बनाउने निर्णय गरेको छ । प्रदेश नम्बर २ को १ बाट डम्बर खड्कालाई र २ को २ बाट खगेन्द्र देवानलाई उम्मेदवार बनाउने निर्णय भएको कांग्रेस जिल्ला कार्य समिति इलामले जनाएको छ 

रास्ट्रिय समाचार

सेयर गर्नुस्